सैनामैना। सैनामैना नगरपालिका–१ स्थित सैनामैना पर्रोहा परमेश्वर नमुना माध्यमिक विद्यालयले अन्तर्राष्ट्रिय गुणस्तर चिन्ह (आइएसओ सटिर्फिकेट) प्राप्त गरेको छ । विद्यालयले शिक्षाको गुणस्तर, उत्कृष्ट नतिजा, भौतिक संरचना, प्रशासनिक व्यवस्थापन, सरसफाइ तथा सुरक्षा प्रणाली लगायतका मापदण्ड पुरा गर्दै अन्तर्राष्ट्रिय मान्यताको आईएसओ लोगो अंकित प्रमाण–पत्र प्राप्त गरेको हो । सोमबार एक समारोहबीच सैनामैना नगरपालिकाका नगर प्रमुख फणेन्द्र प्रसाद शर्मा, आईएसओ नेपाल प्रतिनिधी सुदिप शर्मा लगायतले विद्यालयका अध्यक्ष शिवलाल बस्याल र विद्यायलका प्रधानाध्यापक नेत्र पुरीलाई आइएसओ प्रमाण–पत्र लोगो प्रदान गरेका छन् ।
प्रमाण–पत्र प्रदान गर्दै सैनामैना नगरपालिका प्रमुख शर्माले सैनामैनाको शिक्षा प्राणाली सुधारमा सैनामैना नमुना माविले खेलेको भुमिका अतुलनीय रहेको बताए । विद्यालयले शैक्षिक गुणस्तर चिन्ह आइएसओ लोगो प्राप्त गर्न विभिन्न चरण पार गर्दै अन्तर्राष्ट्रिय मापदण्डस्तर विधालय सरह मान्यता पाएकोमा बधाई तथा शुभकामना दिए । सिमित स्रोतसाधनको अभाव, जनशक्ति व्यवस्थापन चुनौतीको बवजुत पनि निरन्तर विधालय शैक्षिक सुधार र नवीन अभ्यासमार्फत सक्षम र प्रतिष्पर्धी शैक्षिक विकासको रुपान्तरणमा विद्यायल अघि बढेकोमा खुशी व्यक्त गरे ।
विद्यालयले आईएसओ प्रमाण–पत्र प्राप्त गर्नु स्वयं गुणस्तर शिक्षा प्रमाणित हुनु उल्लेख गर्दै विधालयले गर्ने शिक्षण सिकाइमा गुणस्तर, व्यवस्थापनमा पारदर्शिता, र परिणाममुखी कार्यशैलीको मेयर शर्माले प्रसंशा गरे ।
उनले भने, ‘पछिल्लो समय बढ्दो विद्यार्थी पलायन भयावह छ यसले देशलाई आवश्यक जनशक्ति संकट पर्ने डर छ । अबको बदालिदो समयमा विधार्थीको माग र परिवर्तित शिक्षा अनुसार शिक्षा प्रणालीलाई सुधार गर्नुपर्छ र स्वादेशमै विद्यार्थी टिकाउने खालको शैक्षिक कार्यक्रम ल्याउनुपर्छ ।’ उनका अनुसार अबको आवश्यकता भनेकै व्यवहारिक र प्राविधिमैत्री सिपमुलक सिकाई हो । विद्यार्थीलाई विद्यालयमै पढाउ र कमाउ शिक्षातर्फ आकर्षित गर्ने अभियानमा नगरपालिका प्रतिवद्ध रहेको बताए । साथै विद्यालयको समग्र शैक्षिक सुधार, विद्यार्थी संख्या वृद्धि, र आधुनिक शिक्षण प्रविधिको प्रयोगमा नगरपालिका विद्यालयसँग निरन्तर सहकार्य गर्दै अघि बढ्ने विश्वास व्यक्त गरे ।
विद्यार्थी र अभिभावकको माग, चाहना र भावना अनुसार मनोवैज्ञानिक ढंगले अध्यापन हुने गरेको विद्यालयका प्रधानाध्यापक नेत्र पुरीले बताए । विद्यार्थीको सिकाई उपलब्धी हासिल गर्न सृजनशिल र मनोबैज्ञानिक तरीकाले विधालयले अध्यापन गराउँदै आएकोले आईएसओ प्रमाण–पत्र पाएपछि समग्र शिक्षा प्रणालीमा पारदर्शिता, नियमितता र गुणस्तरमा उल्लेखनीय सुधार आएको जानकारी दिए । उनले विद्यालय अब अन्तर्राष्ट्रिय मापदण्ड अनुरूप सञ्चालनमा रहेको र यसले विद्यार्थी, अभिभावक र समुदायमा नयाँ विश्वासको वातावरण निर्माण गर्ने उल्लेख गरे । साथै शैक्षिक गुणस्तर कायम राख्न विद्यालय व्यवस्थापन समिति, शिक्षक, अभिभावक, विधार्थीहरुको साथ, सहयोग र सहकार्य आवश्यकता रहेको बताए ।
आइएसओ प्रतिनिधि सुदिप शर्माले आइएसओका ४५ वटै मापदण्डहरू पालना गर्दै विधालयको शैक्षिक तथा प्रशासनिक र व्यावस्थापकीय उत्कृष्टता लगायतको मुल्यांकन गरेर आइएसओ सर्टिफाइट प्रमाण–पत्र प्रदान गरिएको बताए । आइएसओ मान्यता प्राप्त गरेसंगै यस विधालयका विद्यार्थी शिक्षक तथा कर्मचारीको स्तरसमेत विशिष्ट स्तरको हुने बताउदै सोही अनुसार विधार्थी अभिभावकले पनि बालबालिकाको शिक्षा र सरसफाई लगायतका कुरामा ध्यान दिएर विद्यालयको शैक्षिक गुणस्तर, व्यवस्थापन प्रणाली र सेवा सुधारमा उल्लेखनीय योगदान पुग्ने बताए ।
आइएसओ सर्टिफाइट विद्यालय भैसकेपछि राष्ट्रिय र अन्तराष्ट्रिय प्रतिस्पर्धामा अर्को कोसे ढुंगा सावित भएकोमा शुभकामना दिदै शैक्षिक गुणस्तरमा अझै अब्वल बन्न विद्यालयका सल्लाहकार खुशीराम चौधरीले सुझाव दिए । विद्यालल व्यवस्थापन समितिका अध्यक्ष शिवलाल बस्यालले शैक्षिक गुणस्तर चिन्ह प्राप्त गर्न सबैपक्षको उत्तिकै भुमिका रहेकाले आईएसओ प्रमाणपत्र मान्यतालाई निरन्तरता कायम राख्न विद्यालयमा अझ सुधार गर्नुपर्ने पक्षमा लाग्नुपर्ने जोड दिए । सैनामैना नगरपालिका भित्र सामुदायिक विधालयतर्फ सैनामैना नमुना माध्यमिक विद्यालय पहिलो आईएसओ चिन्ह प्राप्त गर्ने विद्यालय बनेको हो ।
कार्यक्रममा विद्यालयका आईएसओ प्रतिनिधि नारायण गौतमको स्वागत तथा शिक्षक हरिराम पौडेलको सञ्चालन रहेको थियो । विद्यालयमा १ देखि १२ कक्षा सम्मको अध्यापन हुँदै आएको छ । ११ र १२ कक्षामा शिक्षा, वाणिज्य र विज्ञान विषयमा पढाई हुँदै आएको छ । भने यस वर्षदेखि ११ कक्षाँमा कानुन विषय पनि सञ्चालन हुँदैछ ।
