तुलसी राम पौडेल
शुद्दोधन , भाद्र १४
रुपन्देहीको शुद्धोद्वन गाउँपालिका–३ मा अवस्थित ज्ञान ज्योति स्वावलम्बन बचत तथा ऋण सहकारी संस्थाको २७ औं वार्षिक साधारण सभा तथा ११ औं अधिवेशन भव्य रूपमा सम्पन्न भएको छ ।
सभाले पुनः शेरबहादुर थापाको अध्यक्षतामा नयाँ कार्यसमिति सर्वसम्मत चयन गरेको छ । नव–निर्वाचित कार्यसमितिमा उपाध्यक्षमा टिकादेवी न्यौपाने, सचिवमा रमेश गौतम, कोषाध्यक्षमा लक्ष्मण दर्जी र सदस्यहरूमा सुमन थापा क्षेत्री, मिना राना क्षेत्री, शान्ता शर्मा, हिमबहादुर केसी तथा मातृका प्रसाद चौधरी थारु रहेका छन् ।
त्यसैगरी सुपरिवेक्षण लेखा समितिमा सुवास फौदार क्षेत्री संयोजक तथा जमुना खत्री र गीता क्षेत्री फौदार सदस्य चयन भएका छन् ।
कार्यक्रमका अध्यक्षमा शेरबहादुर थापा रहेका थिए भने प्रमुख अतिथि जिल्ला समन्वय समिति रुपन्देहीका प्रमुख उमाकान्त चापागाईं हुनुहुन्थ्यो । विशिष्ट अतिथिमा सहकारी संघ रुपन्देहीका महासचिव दामोदर पंगेनी सहभागी हुनु भएको थियो ।
सभामा निवर्तमान उपाध्यक्ष पार्वता थापाले स्वागत मन्तव्य राख्नुभएको थियो भने सहकारीका सचिव रमेश गौतमले कार्यक्रम सञ्चालन गर्नुभएको थियो । कार्यक्रममा अध्यक्ष शेरबहादुर थापाले अध्यक्षीय प्रतिवेदन, सचिव रमेश गौतमले साङ्गठनिक प्रतिवेदन, लेखा समिति सदस्य सुवास फौदारले लेखा प्रतिवेदन र कोषाध्यक्ष लक्ष्मण दर्जीले आर्थिक प्रतिवेदन प्रस्तुत गर्नुभएको थियो ।
अध्यक्ष शेरबहादुर थापाले सहकारीलाई अझै मजबुत, पारदर्शी र सदस्यमुखी बनाउन आफूले नयाँ कार्यसमितिसँग मिलेर काम गर्ने प्रतिबद्धता व्यक्त गर्नुभयो । उहाँले “सदस्यहरूको हितलाई पहिलो प्राथमिकता दिँदै सहकारीको पहुँचलाई अझै फराकिलो बनाउने हाम्रो लक्ष्य हुनेछ,” भन्नुभयो ।
त्यसैगरी प्रमुख अतिथि उमाकान्त चापागाईंले सहकारीलाई गाउँघरको आर्थिक मेरुदण्ड भन्दै सहकारीले सदस्यहरूको जीवनस्तर उकास्न महत्वपूर्ण योगदान दिइरहेको उल्लेख गर्नुभयो । उहाँले “सहकारीहरू आत्मनिर्भर अर्थतन्त्र निर्माणको आधारशिला हुन्, यसलाई पारदर्शी र जिम्मेवार बनाएर अघि बढाउनु जरुरी छ,” भन्ने धारणा व्यक्त गर्नुभयो ।
कार्यक्रममा सहकारी संजाल शुद्धोद्वन गाउँपालिका अध्यक्ष लेखबहादुर खत्री र गणपति बहुउद्देश्यीय सहकारीका अध्यक्ष गोविन्द घिमिरेलगायतले पनि शुभकामना मन्तव्य व्यक्त गर्नुभएको थियो ।
