बुटवल । बुटवल–११ देवीनगरस्थित पथ प्रदर्शक बचत तथा ऋण सहकारी संस्था लिमिटेडको १७औँ वार्षिक साधारणसभा शनिबार सम्पन्न भएको छ । साधारणसभाको संस्थाका जेष्ठ सदस्य तेजप्रसाद अर्यालले उद्घाटन गरे । सोही अबसरमा बोल्दै उनले संस्थालाई सवल र सक्षम बनाउन सहकारीको ऐन नियमलार्ई कडाईका साथ पालना गर्नुपर्ने बताए । नीति तथा विधिमा रहेर सञ्चालनमा रहेका सहकारीहरूमा कुनैपनि समस्या नआउने उनले दाबी गरे । सहकारीलाई जीन्दगीको सारथीका रुपमा विकास गर्नुपर्नेमा अर्यालले जोड दिए ।

कार्यक्रममा संस्थाका अध्यक्ष लिलबहादुर केसीले वार्षिक प्रतिवेदन प्रस्तुत गर्दै वर्षभरि गरेका विभिन्न कार्यक्रम तथा आगामी योजनाहरुबारे जानकारी गराए । संस्थालाई आर्थिक रुपमा अझै बलियो बनाउन खर्चमा मितव्ययिता अपनाइएको उनले बताए । साथै संस्थालाई थप सुदृढ र व्यवस्थित गरी थप उचाइमा पु¥याउन सबै शेयर सदस्यहरूको हातेमालो र ऐक्यबद्धता आवश्यक पर्ने भन्दै अध्यक्ष केसीले सहयोगको अपेक्षा गरे । शेयर सदस्यहरुलाई शुलभ, प्रविधियुक्त, सदस्यमैत्री सेवा प्रदान गर्न संस्था सधैँ लागिरहने उनको भनाइ थियो ।

संस्थाका संथापक अध्यक्ष चन्द्रमणि अधिकारीले राम्रा काम गर्दै आएका सहकारी संस्थाहरूलाई पनि पछिल्लो समय गलत आर्थिक कारोबार गर्ने सहकारीकै रूपमा हेरिएको भन्दै चिन्ता व्यक्त गरे । गलत मनसाय बोकेका सहकारी सञ्चालकहरूले मात्रै बदमासीले सबै सहकारीप्रति एउटै दृष्टिकोण बनाउन नहुने उनको भनाई थियो ।
यस्तै बुटवल उपमहानगरपालिका–११ का वडाध्यक्ष रामचन्द्र क्षेत्रीले देशमा बढ्दै गइरहेको निराशा र आर्थिक संकटलाई कम गरी अर्थतन्त्र चलायमान बनाउन सहकारीको भूमिका महत्वपूर्ण रहने बताए । सहकारीहरुले सामाजिक उत्तरदायित्वका कामसँगै उत्पादनमूलक क्षेत्रमा लगानी गरी आर्थिक समृद्धिसँग जोडिनुपर्नेमा उनले जोड दिए ।

कार्यक्रममा साइनो बचत तथा ऋण सहकारीका अध्यक्ष भोजबहादुर केसी, संस्थाका शेयर सदस्य दीपक पन्थी, रबि पोखरेल, गणेशप्रसाद श्रेष्ठलगायतले आआफ्नो भनाई राख्दै सदस्यलाई उत्पादनशील र व्यावसायिक बनाउन संस्थाले सहयोग गर्नुपर्नेमा जोड दिए । साधारणसभामा कोषाध्यक्ष लक्ष्मण ज्ञवालीले आर्थिक प्रतिवेदन र लेखा समिति संयोजक कृष्ण थापा क्षेत्रीले लेखा सुपरिवेक्षण समितिको प्रतिवेदन प्रस्तुत गरेका थिए । ती सबै प्रतिवेदन साधारणसभाले पारीत गरेको छ ।

यस्तै सोही अवसरमा सहकारीका उत्कृष्ठ बचतकर्ता, असल ऋणी, जेष्ठ सदस्य लगायतलाई सम्मान गरिएको थियो । हाल सहकारीमा १ हजार ८३ जना शेयर सदस्य रहेका छन् । २ करोड ६६ लाख ६ हजार रुपैयाँ शेयर पूँजी रहेको सहकारीले १३ करोड १८ लाख ७१ हजार ८६२ रुपैयाँ ऋण लगानी गरेको छ । यस्तै १५ करोड २९ लाख ५४ हजार ८७३ रुपैयाँ बचत/निक्षेप रहेको छ । संस्थाका उपाध्यक्ष सन्तोषकुमार श्रेष्ठको स्वागत तथा सचिव विष्णुमाया थापाको सञ्चालनमा कार्यक्रम सम्पन्न भएको थियो ।