बुटवल, । सुनौलो बिहानी फूर्तिलो समूह,बुटवल तीज दिन शुक्रबार बुटवल–७ दीपनगरस्थित सिद्देश्वरीको खेल मैदानमा भव्य तीज विशेष कार्यक्रम सम्पन्न गरेको छ । मानिसलाई स्वस्थ जीवन बाँच्न प्रेरणा जगाउँदै आएको समूहले पहिलोपटक आयोजित तीज विशेष कार्यक्रममा हजारौं दर्शकको सहभागिता रहेको थियो । कार्यक्रमको उद्घाटन गर्दै बुटवल उपमहानगरपालिकाका प्रमुख खेलराज पाण्डेयले तीजलाई संस्कृतिक रुपमा मनाउनुपर्ने बताए । कार्यक्रम संयोजक तथा समूहकी अध्यक्ष विष्णुमाया श्रेष्ठले मनोरञ्जन सँगसँगै दिदी बहिनीबिच सुखदुःख साटासाट गर्ने उद्देश्यले कार्यक्रम गरिएको कार्यक्रमले हौशला थपेको बताउँदै आगामी दिनमा पनि कार्यक्रम गर्दै जाने बताइन् ।
कार्यक्रममा आमा दिदी बहिनीहरुका विभिन्न समुहसँगै राष्ट्रिय स्तरका कलाकारहरूको बेजोड प्रस्तुति रहेको थियो । हाँस्यकलाकार तथा गायक पुर्खे बा, उज्जवल गिरी, गायिका मञ्जु भट्टराई, तारा थापा, सकुन्तला गैरे, नारायण लेकाली, कोपिला न्यौपानेलगायतका कलाकारले कार्यक्रममा प्रस्तुतिमा दर्शक झुमेका थिए । कार्यक्रममा सहकार्य गर्दै बुटवल उपमहानगरपालिका, वडा नम्बर ७ र ८ कार्यालय, विभिन्न संघसंस्था र व्यक्तिहरुले आर्थिक सहयोग गरेका थिए । तीजमा मौलिक तीज भाकाहरु पस्कन र आमा दिदीबहिनीहरुलाई जमघटले राम्रो आशा जगाएको समूहका संस्थापक अध्यक्ष अनन्तमान थैबले जानकारी दिए । समूहका सचिव देवीराम पन्थ (डीआर) ले आगामी दिनमा स्वास्थ्य सचेतनासम्बन्धी कार्यक्रम पनि गरिने जानकारी दिए ।
