वि.सं.२०५७ साल मंसिर ३० गतेदेखि निरन्तर प्रकाशन हुँदै आएको मेचीकाली सन्देश राष्ट्रिय दैनिक आज २५ वर्ष पूरा गरी २६ औँ वर्षमा प्रवेश गरेको छ । रजत जयन्ती वर्ष सफलतापूर्वक पूरा गरी अब अर्को खुड्किलोतर्फ अघि बढ्ने यस महत्वपूर्ण मोडमा हामी पाठक, विज्ञापनदाता, शुभेच्छुक र सम्पूर्ण सञ्चारकर्मीप्रति हार्दिक कृतज्ञता व्यक्त गर्दछौँ ।
नेपाली समाजको परिवर्तन र विकास यात्रामा मेचीकाली सन्देश सधैँ जनताको आवाजलाई प्राथमिकतामा राख्दै सत्य, न्याय, लोकतन्त्र र मानव अधिकारको पक्षमा दृढतापूर्वक उभिँदै आएको छ । विभेद, अन्याय, निरंकुशता, भ्रष्टाचार र बेथितिविरुद्ध निर्भीक पत्रकारितामार्फत खबरदारी गर्दै, सकारात्मक र जिम्मेवार पत्रकारिताको अभ्यासलाई हामीले आफ्नो पहिचान बनाएका छौँ ।
लोकतान्त्रिक गणतन्त्र स्थापना होस् वा त्यसअघि पछिका परिवर्तनका लागि भएका जेनजीलगायतका विभिन्न खालका क्रान्ति र आन्दोलनको घडीमा मेचीकाली जनताका जायज संघर्षसँगै उभियो । हिंसा, अराजकता र असत्यको पक्षपोषण नगरी शान्ति, सद्भाव, विवेक र मानवताको पक्षमा तथ्यमा आधारित समाचार र विचार प्रस्तुत गर्नु हाम्रो अडान रहँदै आएको छ । जनपक्षीय, जवाफदेही र जिम्मेवार पत्रकारिता नै मेचीकाली सन्देशको मूल मिशन हो ।
चार पृष्ठको श्याम–श्वेत संस्करणदेखि आजको रंगीन ब्रोडसिट र डिजिटल प्लेटफर्मको अनलाइनसम्म आइपुग्दा पनि मेचीकालीको आफ्नै शैली, मूल्य र सम्पादकीय नीति अडिग छ । संविधान, कानुन, आचारसंहिता र व्यावसायिक मर्यादालाई आत्मसात् गर्दै हामी पारदर्शी र विश्वासिलो आमसञ्चार माध्यमका रूपमा निरन्तर सक्रिय छौँ । हामीले सगौरव भन्छौं–मेचीकालीले उठाएका विषयहरूले समाजलाई पटक–पटक सचेत गराएका छन् र परिवर्तनका लागि उत्प्रेरित गरेका छन् ।
नयाँ राजनीतिक व्यवस्थापछि पनि समाजका विसंगति, बेथिति र भ्रष्टाचारविरुद्ध मेचीकाली सन्देशको अभियान अविराम छ । जनताको जीवनस्तर सुधार, सुशासनको प्रवद्र्धन, अभिव्यक्ति स्वतन्त्रता र लोकतान्त्रिक मूल्य–मान्यतालाई सुदृढ बनाउनु हाम्रो सम्पादकीय प्रतिबद्धता हो ।
आजको २६ औँ वार्षिकोत्सवको अवसरमा, मेचीकाली सन्देश सत्य र न्यायको सारथी बनेर जनताको विश्वासलाई अझ बलियो बनाउँदै अघि बढ्ने दृढ संकल्प पुनः व्यक्त गर्दछ । समृद्ध नेपाल, सुखी नेपालीको राष्ट्रिय आकांक्षालाई केन्द्रमा राख्दै हामी सचेत, जिम्मेवार, सत्यनिष्ठ र जनपक्षीय पत्रकारितामा निरन्तर प्रतिबद्ध रहनेछौँ । मेचीकाली सन्देश–सत्य र सकारात्मकताको साथमा ।
होमराज बस्याल
अध्यक्ष