बुटवल । बुटवल–११ देवीनगरस्थित सम्बन्ध बहुउद्देश्यीय सहकारी संस्था लिमिटेडले आफ्नो छैठौं स्थापना दिवसको अवसरमा आइतबार शिवनगरस्थित नन्दिनी गौशालामा पशु आहार हस्तान्तरण गरेको छ । विगतका वर्षमा पनि रचनात्मक कार्य गर्दै स्थापना दिवस मनाउँदै आइरहेको सहकारीले यस वर्ष गौशालाका गाई वस्तुलाई आवश्यक खाद्यान्न उपलब्ध गराएर आफ्नो स्थापना दिवस मनाएको हो ।
सहकारीका सल्लाहकार तथा बुटवल उपमहानगरपालिका वडा नम्बर–११ का वडा अध्यक्ष रामचन्द्र क्षेत्रीले गौशालाका व्यवस्थापक रानी कानु बानियालाई गौ आहार हस्तान्तरण गरे । सो अवसरमा बोल्दै वडा अध्यक्ष क्षेत्रीले सम्बन्ध सहकारीले सामाजिक उत्तरदायित्व पूरा गरेको बताए । उनले गौशालालाई सबैको साथ र सहयोग आवश्यक रहेको भन्दै आगामी दिनहरुमा पनि पुन्य काममा हात फैलाउन सहकारीलाई आग्रह गरे । सो अवसरमा बोल्दै सहकारीका अध्यक्ष लोकराज शर्माले सबै क्षेत्रको साथ र सहयोगबाट सहकारी छोटो समयमा यहाँसम्म आउन सफल भएको बताए ।
सहकारीलाई नमूना बनाउदै सबैको भरोसायोग्य वित्तीय संस्था बनाउन आफूहरु निरन्तर खटिरहेको शर्माको भनाइ छ । कार्यक्रममा स्वागत गर्दै सहकारीका उपाध्यक्ष विष्णु कुमारी गौतमले गाई र गौशाला संरक्षण गर्नु सबैको दायित्व रहेको बताइन । कार्यक्रमको सञ्चालन सहकारीका सचिव कमल नेपालले गरेका थिए ।
कार्यक्रममा सहकारी संस्थाका सल्लाहकार, सञ्चालक समितिका पदाधिकारी तथा, सदस्यहरु, लेखा सुपरीबेक्षण समितिका संयोजक एवं सदस्यहरु, विभिन्न उपसमितिका सदस्यहरु र कर्मचारीको सहभागिता रहेको थियो । सहकारीमा ७५० शेयर सदस्यहरु रहेका छन भने, १ करोड २५ लाख शेयर पूँजी, ५ करोड बचत, ५ करोड ऋण लगानी गरेको छ ।
