अमृत गिरी
बुटवल। नेकपा एमाले लुम्बिनी प्रदेश कमिटीको नयाँ नेतृत्व चुनाबबाट गर्नेगरी प्रक्रिया अगाडि बढेको छ । प्रदेश कमिटीको अध्यक्षका लागि राधाकृष्ण कंडेल र हरिप्रसाद रिजालले उम्मेदवारी दर्ता गराएका छन् । कंडेल वर्तमान अध्यक्ष हुन् भने रिजाल केन्द्रीय सदस्य हुन् ।
यद्यपि मतदानको प्रक्रिया सुरु हुनुअघिसम्म पनि फिर्ता लिन लगाएर सहमतिको पहल जारी राखिने बताइएको छ । अध्यक्षका दाबेदारहरु बीच सहमति जुट्न नसक्दा र हलको मनस्थिति पनि समय लम्ब्याउन नहुने देखिएपछि आइतबार दिउसो देखि नै निर्वाचन कमिटीले चुनावी प्रक्रिया अगाडि बढाएको थियो ।
आइतबार बेलुकादेखि सुरु भएको उम्मेदवारी दर्ता सोमबार बिहान १० बजेसम्मका लागि समय निर्धारण गरिएको पार्टीको केन्द्रीय निर्वाचन कमिटी सदस्य भरत पोखरेलले जानकारी दिए । उम्मेदवारी दर्ता गर्ने मिति र समय बाहेक सबै कार्यक्रमहरु पछि प्रकाशित गर्ने गरी उम्मेदवारहरुले सोमबार बिहान १० बजे सम्म उम्मेदवारी दर्ता गर्नसक्ने गरी सूचना टाँस गरिएको छ ।
साँझ ५ बजेबाट उम्मेदवारी दर्ता खुलेको थियो । जस अनुसार आइतबार राति ९ बजेसम्म अध्यक्ष पदमा २ जना र अन्य पदाधिकारी र सदस्यहरु गरी १०५ जनाको उम्मेदवारी दर्ता भएकोे छ । पाँच जना पदाधिकारीका लागि आइतबार रातिसम्म अध्यक्षमा २ जना, उपाध्यक्षमा ३ जना, सचिवमा ३ जना, उपसचिवमा १२ जनाको उम्मेदवारी दर्ता भएको बताइएको छ ।
रिजालको उम्मेदवारीमा प्यूठानका अध्यक्ष बिजयविराज बिष्ट प्रस्तावक र गुल्मीका अध्यक्ष बालसिंह काउछा समर्थक रहेका छन् भने कंडेलको उम्मेदवारीमा पाल्पाका नेता राजुप्रसाद श्रेष्ठ प्रस्तावक र भोजराज पोखरेल (रामजी) समर्थक रहेका छन् ।
कंडेल एक वर्षअघि गठन भएको प्रदेश अध्यक्ष हुन् भने रिजाल पूर्वप्रदेश मन्त्री एवं एमाले केन्द्रीय सदस्य हुन् । पार्टी अध्यक्ष केपी शर्मा ओलीले उद्घाटन समारोह र आइतबार बिहान बन्द सत्रमा पनि सहमतिबाट नेतृत्व चयन गर्न आग्रह गरेका थिए । तर कसैले पनि दाबी नछोडेपछि सहमतिको सम्भावना करिब टरेको नेताहरु बताउँछन् ।
यसैगरी उपाध्यक्षमा भोजप्रसाद श्रेष्ठ, पूर्ण बुढा, पुजन विश्वकर्मा, सचिवमा लक्ष्मण आचार्य, सोम सापकोटा र उपसचिवमा १२ जनाले उम्मेदारी दर्ता गरेको बताइएको छ ।
सहमति नजुटेपछि अध्यक्ष मण्डलले मतदाताको अन्तिम नामावली प्रकाशन गरेर निर्वाचन प्रक्रिया अघि बढाएको निर्वाचन प्रमुख हरिप्रसाद भण्डारीले बताए । यद्यपि प्रदेश कमिटीमा क्लस्टरगत पदाधिकारी र सदस्य कतिजना रहने भन्ने यकिन नभएकाले अन्य निर्वाचन प्रक्रिया लम्बिएको उनले बताए । मतदान भएको खण्डमा सोमबार बिहान १० बजेपछि मात्रै सुरु हुने भण्डारीले बताए ।
पार्टीको प्रथम प्रदेश अधिवेशनले २०५ सदस्यीय प्रदेश कमिटी चयन गर्दैछ । १२ जिल्लाबाट जिल्लागत रुपमा १८६, अपांगबाट एक, मजदुरबाट ३ र खुल्लाबाट पदाधिकारीसहित १५ जना चयन हुँदैछन् ।
जसअनुसार १२ वटै जिल्ला कमिटीहरुले सहमतिमा नाम पठाउन अलग अलग वैठक गरेका थिए । तीमध्ये कतिपय जिल्लाले सर्वसम्मत नाम सिफारिस गरेका छन् । कतिपय जिल्लाबाट सदस्यहरु सर्वसम्मत चयन भए पनि घोषणा भने बाँकी छ । सहमति नभएका जिल्लाका लागि निर्वाचन हुनेछ ।
अध्यक्ष मण्डलका संयोजक पद्मा अर्याल र सूर्य थापालगायतका नेताहरुले सहमतिका लागि आइतबार विभिन्न चरणमा यहाँका विभिन्न तहका नेताहरु र उम्मेदवारका आकांक्षीसंग छलफल गरेका थिए । अध्यक्ष ओलीले आइतबार बिहान बन्दसत्रमा सम्बोधन गर्दै सकेसम्म सर्वसम्मत नेतृत्व छान्न आग्रह गर्दै अध्यक्ष मण्डललाई जिम्मेवारी दिएका थिए ।
अधिवेशनमा १२ वटै जिल्लाका ८२ हजार ८९५ पार्टी सदस्यबाट एक सय जना बराबर एक जना र २३ वटा जनसंगठनबाट ८३ जना गरी एक हजार ४ प्रतिनिधि छनोट भएका थिए । सम्मेलनमा रुपन्देहीबाट सबैभन्दा धेरै १६४, कपिलवस्तुबाट ७२, दाङबाट १३१, बाँकेबाट ५४, बर्दियाबाट ७४, रुकुमपूर्वबाट १२, रोल्पाबाट २७, प्युठानबाट ५७, अर्घाखाँचीबाट ८२, गुल्मीबाट १११, पाल्पाबाट ८३ र पश्चिम नवलपरासीबाट ५२ जना प्रतिनिधि छनोट भएका छन् । अधिवेशनले यसअघि ५७६ सदस्यीय रहेको प्रदेश कमिटीलाई २०५ सदस्यीय बनाउनेछ ।
