बुटवल। बुटवल। बुटवल दिपनगरस्थित सिद्धार्थ बाल तथा महिला अस्पताल (आम्दा) का मेडिकल सुपेरिटेन्डेन्ट डा. राजेन्द्र बस्यालमाथि आक्रमण भएको छ। सुत्केरी महिलाको मृत्युको विषयलाई लिएर मृतकका आफन्तहरुले डा. बस्यालमाथि कुटपिट गरेका हुन् ।
मंसिर १२ गते गुल्मीको सत्यवती गाउँपालिका ठूलो लुम्पेककी ३२ वर्षिया भवानी रास्कोटीको उपचारको क्रममा मृत्यु भएको थियो । मंसिर ११ गते अपरेसन गरी ५ किलो तौलको बच्चा जन्माएकी रास्कोटीको मृत्यु अस्पतालको लापहरवाहीका कारण भएको आफन्तले आरोप लगाएपछि अस्पतालमा तनाव सिर्जना भएको थियो । सोही विवाद समाधानका लागि बसेको बार्ताको क्रममा बिरामीका आफन्तले डा. बस्याललाई आक्रमण गरेको अस्पतालले जनाएको छ । नवजात शिशु भने सकुशल रहेको अस्पताल व्यवस्थापनले जनाएको छ । कुटपिटबाट घाइते भएका डाक्टरको लुम्बिनी प्रादेशिक अस्पतालको आइसियू कक्षमा उपचार भैरहेको छ ।
मृतकका आफन्तले मृत्युको विषयमा छानबिन गर्ने भन्दा पनि सुरु देखि नै ५० लाख रुपैयाँ क्षतिपूर्ति रकम मागेपछि स्थिति असहज बन्दै गएको अस्पताल श्रोतले बताएको छ । अस्पताल प्रशासनसँग सहमति भई मृतकको शव आफन्तले शव बहनामा राखेर निस्कने तयारी भई सकेपछि केही उत्तेजक समूहको भिड पसेर मेसु बस्यालमाथि आक्रमण गरेको एक चिकित्सकले बताए । अहिले मृतक महिलाको शव अस्पताल परिसरमै शव बहनामा राखिएको छ ।
मृतकका आफन्तहरूको आक्रमणमा अस्पतालको प्रशासनिक भवनका झ्याल ढोका लगायतका फर्निचरहरू तोडफोड भएको छ। अस्पताल अहिले प्रहरीको सुरक्षामा रहेको र कुनै पनि नयाँ बिरामीहरूको भर्ना गरिएको छैन ।
राती २ बजेबाट अस्पताल आउने बिरामीहरू अस्पतालको गेटबाटै फर्काइएको छ भने अहिले अस्पतालका भर्ना भएर उपचाररत बिरामीहरू हेर्नेबाहेक सबै काम ठप्प रहेको अस्पताल प्रशासनले जनाएको छ ।
प्रहरीले घटनामा संलग्न ४ जनालाई नियन्त्रणमा लिएर अनुसन्धान सुरु गरेको इलाका प्रहरी कार्यालय बुटवलका प्रहरी नायव उपरीक्षक दानबहादुर थापाले बताए ।
लुम्बिनी चिकित्सक संघका सचिव डा. सन्तोष पोखरेलले उपचार गर्ने चिकित्सकमाथि हातपात हुनु दुर्भाग्यपूर्ण भएको बताए । चिकित्सकको सुरक्षाको ग्यारेन्टी नभएसँग आफूहरू उपचार रोकेर विरोध गर्ने बताए ।
