मेसस पुस १०
चेपाङ समुदायलाई आयआर्जनसंग जोडी परिवारको आयस्रोत बढाई सामुदायीक विकासमा सहयोग गर्ने उद्देश्यका साथ गण्डकी गाउँपालिकाको आयोजना र तारा नमस्ते फाउण्डेशन काठमाडौंको सहयोगमा गण्डकी गाउँपालिकाको वडा नं ७ र ६ का चेपाङ समुदायकालागि ब्यवसायीक बाख्रा पालन तालिम सम्पन्न भएको छ ।
वडास्तरीय परियोजना ब्यवस्थापन तथा अनुगमन समिति वडास्तरमा गठन साथै अभिमुखिकरण गरी वडा नं ७ को खरेटार, सल्लेरी, लामीडाँडा र वडा नं ६ को कौदी खोलामा ब्यवसायीक बाख्रा पालन तालिम दिईएको हो । मुल समुहका ५८ जना चेपाङको उपस्थितिमा स्थलगत तालिम वडा नं ५ का पशु सेवा प्राविधिक नविन उपाध्यायबाट संचालन गरिएको थियो ।
परियोजना अन्र्तगत बाख्रापालनका लागी ८ वटा समुह र कुखुरा पालनको १ समुह गरी १ सय २८ चेपाङ परिवारलाई प्रत्येक्ष लाभ हुनेगरी तालिम संचालन गरिएको संस्थाका अध्यक्ष ईश्वर श्रेष्ठले बताउनु भयो । अध्यक्ष श्रेष्ठका अनुसार वडा नं ७ र ६ मा प्रजनन्कालागी ४ वटा उन्नत वयर जातको बोका उपलब्ध गराउने, उपलब्ध बोका र बाख्राको विमाको ब्यवस्था गर्ने साथै बाख्राकोलागी ब्यवस्थीत खोर निमार्णकालागि परियोजनाबाट सहयोग उपलब्ध गराईने जानकारी दिनुभयो ।
तालिममा यस परियोजना अन्र्तगत मुल समुहका सदस्यहरुलाई वितरण गरिएको बाख्राले पाएको पाठी १०० दिन पुरा भएपछि उपहार समुहलाई हस्तान्तरण गरिने छ । यसले चेपाङ समुदायमा आफूले प्राप्त गरेको उपहारबाट आफ्नो जीवनस्तरमा गुणात्मक सुधार ल्याई वास्तविक आवश्यकता भएको अर्को व्यक्ति, परिवार तथा समूहहरूलाई उपहार प्रदान गर्दै जाने छ । परियोजनाको स्थापित मान्यताले गर्दानै कार्यक्रमको प्रभावकारिता बढ्दै जाने र व्यक्ति तथा समुदायमा अपनत्वको भावना विकास हुने बारे वडा नं ७ का वडा अध्यक्ष तुलसी रेग्मीले बताउनु भयो ।
चेपाङ समुदायको सामुदायीक विकाशकालागि धेरै क्षेत्रमा सुधारको आवश्यक रहेको बताउँदै आय आर्जनका साथ साथै स्वच्छ पानी र सरसफाई सम्बन्धि ब्यवहार परिवर्तनका कार्यक्रमहरु पनि संगसंगै संस्थाले संचालन गर्न आवश्यक रहेको गाउँपालिकाका उपाध्यक्ष ललिता अधिकारीले बताउनु भयो । चेपाङ परिवार साथै समुदायको दिगो विकासकालागी आवश्यकता अनुसार संस्थासंग सहकार्य गरी पालिका अगाडी बड्न तयार रहेको छ । दुवैको उदेश्य एकै रहेकाले प्रभावकारी रुपमा गाउँपालिकासंग समन्वय गरी परियोजना समुदायस्तरमा संचालन गर्दा नियमित रुपमा अनुगमन हुनुको साथै परियोजना प्रभावकारी रुपमा सम्पन्न हुने पालिकाका अध्यक्ष दिपक तिमल्सिनाले जानकारी दिनुभयो ।
