बुटवल, साउन २५ । न्यू होराइजन इङ्लिस बोर्डिङ सेकेण्डरी स्कूल बुटवलले कक्षा १२ को हालै सार्वजनिक नतिजामा ३.९६ जीपीए हासिल गरी नेपाल प्रथम हुन सफल छात्रद्घय वैभव क्षेत्री र दर्शन भटटराईसहित उत्कृष्ट नतिजा ल्याउने विद्यार्थीहरुलाई सम्मान गरेको छ । विद्यार्थी वैभव र दर्शनको उच्चतम अंकसहित विद्यालयबाट परीक्षामा सहभागी शतप्रतिशत विद्यार्थी उत्तीर्ण भएका छन् । विद्यालयले आइतबार एक समारोह आयोजना गरी सम्पूर्ण विद्यार्थीलाई बधाई तथा आगामी शैक्षिक यात्राको शुभकामनासहित सम्मान गरेको हो ।
सो अवसरमा बोल्दै राष्ट्रिय परीक्षा बोर्ड प्रादेशिक कार्यालय बुटवलका प्रमुख रोमकान्त तिवारीले होराइजन शिक्षण संस्थाको रुपमा देशकै उत्कृष्ट रहेको बताए । तिवारीले एकेडेमिक सर्टिफिकेट साथमा व्यावहारिक ज्ञान सीप आवश्यक आउवश्यक रहेको बताउँदै देशकै शैक्षिक गुणस्तर कायम गर्न न्यू होराइजनको योगदान ठूलो योगदान रहेको समेत चर्चा गरे । विद्यालय सञ्चालक समिति अध्यक्ष ज्ञानेन्द्र कसजूले गुणस्तरीय शिक्षाका लागि न्यू होराइजन स्थापना गरेको बताउँदै उत्कृष्ट नतिजामा दिन निरन्तर सफल भइरहेको बताए ।
उनले होराइजन संस्था अन्तर्गत उच्च शिक्षाका लागि क्षितिज इन्टरनेशल कलेज कालिकानगर, बुटवल मोडेल कलेज कटैया, न्यू होराइजन कलेज ड्राइभरटोल समेतमा गुणस्तरीय शिक्षा दिइरहेको अध्यक्ष कसजूको भनाइ छ । कार्यक्रममा विद्यालयका प्राचार्य लोकनाथ उपाध्यायले प्लस टु उत्तीर्ण मेधावी विद्याथीले स्वदेशमा अध्ययन गरी आफ्नो अब्बलता कायम गर्नु सुझाव दिए । प्राचार्य उपाध्यायले स्नातक तहको पढाइ पनि होराइजनका संस्थामा जोडिएर अगाडि बढाउन पनि सफल विद्यार्थीलाई आग्रह गरे । सो अवसरमा बोल्दै विद्यार्थी वैभव क्षेत्रीले सानैदेखि मनमा दृढ इच्छा र लगनशीलताले उत्कृष्ट नतिजा हासिल गर्न सफल भएको बताए । अर्का विद्यार्थी विवेक न्यौपानेले विद्यालयको सुविधासम्पन्न शैक्षिक वातावरण, शिक्षकहरुको उत्प्रेरणा, परिवारको साथ र साथीहरुको प्रोत्साहनले उत्कृष्ट नतिजा आएको बताए । कार्यक्रममा विद्यालयका उपप्राचार्य बाशुदेव अर्याल, अभिभावक संघ, रुपन्देहीका अध्यक्ष लोकनाथ उपाध्याय, अभिभावक कृष्ण पौडेल, न्यू होराइजन लेखा समिति सदस्य अशिस भण्डारी लगायतले बोलेका थिए । सो अवसरमा शिक्षकहरुलाई पनि सम्मान गरिएको थियो । कार्यक्रमको सञ्चालन शिक्षक मिलन रानाले गरेका थिए ।