बुटवल । विभिन्न ठाउँबाट बुटवल झरेर पेशा व्यवसाय गरेका युवा जमातको क्लब एमजी क्लब हो । संस्कार संस्कृति सरक्षण खेलकुद साथै विभिन्न सामाजिक काम गर्दै आएको यस क्लबले मगर पहिचान र संस्कृतिको संरक्षणमा योगदान गर्दे आएको छ । ४३ औँ मगर एकता दिवसका अवसरमा आयोजित एक कार्यक्रमलाई सम्बोधन गर्दै लुम्बिनी प्रदेशका प्रदेश सभा सदस्य तथा पूर्व जलस्रोत मन्त्री वीरबहादुर रानाले नेपालको एकीकरणदेखि जनआन्दोलन सम्म योगदान गरेको भएपनि राज्यले मगर समुदायप्रति उपेक्षा गरेको बताए ।
मगर समुदायका लागि शिक्षा नै पहिलो आवश्यकता भएकाले संस्कार संस्कृति जोगाउने र आफू पनि सक्षम र शसक्त बनेर मात्र राज्यको मूल धारमा आउन सकिने भन्दै जुनसुकै राजनैतिक आस्थाबाट समुदायको परिवर्तनका पक्षमा काम गर्न सकिने बताए । मुलुकमा वर्तमान समयमा अतिवाद हाबी भएको बताउँदै नेपालको श्रद्धाभाव सामाजिक एकतामा मगर समुदाय कहिल्यै पछाडि हट्न नहुने बताए । कार्यक्रममा नेपाल मगर संघका केन्द्रीय सहअध्यक्ष दलबहादुर वीरकट्टाले मगर इमानका साथ काम गर्ने सोझो जाति भएकाले दलहरुले उपयोग मात्र गर्ने बताए ।
विभिन्न दलमा लागेका मगर समुदायहरु एकजुट भएका आफ्नो अस्तित्वका लागी लडाइँ लड्नुपर्ने आजको आवश्यकता भएको औल्याए । नेपाल मगर महिला संघका केन्द्रीय अध्यक्ष हिरु रानाले मगर समुदाय आर्थिक हिसाबमा पनि अगाडि बढ्नुपर्ने भन्दै समावेशीतामा कार्यान्वयन र संविधानमा प्रदत्त अधिकार स्थापित गराउन मगर संघ र मगर महिला संघले निर्णायक कदम चाल्नुपर्ने अवस्था आएको बताइन् । कार्यक्रममा बुटवल उपमहानगरका प्रवक्ता शिव रानाले मगर समुदायको विकासका लागि सक्दो काम भइरहेको भन्दै नागरिक बडापत्र मगर भाषामा राखिएकोले पहिचानमा यसले मद्दत गर्ने तर्क छ ।
