रमेश पराजुली
बुटवल। बुटवल उपमहानगरपालिका–१० अन्तर्गत रामनगर क्षेत्रको शहरी विकासको गति तीव्र बन्दै गएको छ । बस्तीलाई थप व्यवस्थित, सुन्दर र हरित बनाउन संघीय, प्रदेश र स्थानीय सरकारको समन्वयमा एकीकृत प्रयास सुरु भएको छ । हाल रामनगर क्षेत्रमा १३ करोड ३५ लाख रुपैयाँ बराबरको बजेटमा नालीसहितका सडक निर्माण र दुई राजमार्ग जोड्ने हरियाली पथको स्तरोन्नति कार्य तीव्र गतिमा अगाडि बढाइएको छ ।
हरियाली पथले पूर्व–पश्चिम महेन्द्र राजमार्ग र सिद्धार्थ राजमार्गलाई जोड्छ । यो सडक रामनगर अन्तर्राष्ट्रिय सभा हलको छेउँबाट योगीकुटी विद्युत् स्टेशनसम्म पुग्नेछ । यसले दुई राजमार्ग, बस्ती र पालिकालाई समेत जोड्नेछ । जंगल छेउको वाइपास भएकाले यसलाई हरियाली पथ भनिएको हो । रामनगर बस्तीका आन्तरिक सडकहरुमा नाली निर्माणका साथै स्तरोन्नति कार्य भइरहेको छ भने, मुलुकका दुई मुख्य राजमार्ग (पूर्व–पश्चिम र सिद्धार्थ राजमार्ग) जोड्ने रणनीतिक महत्वको ‘आन्तरिक वाइपास’ सडकको रुपमा रहेको हरियाली पथको २५ सय मिटर खण्डमा कालोपत्रे (पिच) गर्न बजेट विनियोजन गरिएको हो ।
सांसदहरूको अगुवाई, स्थानीयको अपनत्व
योजनाको सफल कार्यान्वयनका लागि संघीय सांसद विष्णु पौडेल र लुम्बिनी प्रदेशका पूर्वमुख्यमन्त्री तथा प्रदेश सांसद लिला गिरीको विशेष पहल र अगुवाईमा बजेट विनियोजन भई अहिले कार्यान्वयन भइरहेको एमाले बुटवल उपमहानगर कमिटी अध्यक्ष शोभाखर पोखरेलले बताए । यता बुटवल उपमहानगरपालिका वडा नम्बर १० का वडाध्यक्ष तथा युवा नेता बलबहादुर पुनले स्थानीय बस्तीलाई नमुना बनाउने, हरियाली प्रवद्र्धन गर्ने र योजना निर्माणमा स्थानीयको सक्रिय सहभागिता सुनिश्चित गर्ने प्रयास गरिएको बताए । उनले भने, ‘वडाका बस्तीलाई सुन्दर र व्यवस्थित बनाउने, तीनै तहका सरकारसँग समन्वय गर्दै योजना छनोट गरिएको हो ।’
स्थलगत निरीक्षण, गुणस्तरमा जोड
पूर्वमुख्यमन्त्री तथा प्रदेश सांसद लिला गिरीले प्राविधिक टोलीसहित आइतबार निर्माणस्थलको निरीक्षण गरेका छन् । निरीक्षणका क्रममा सांसद गिरीले निर्माणकार्य गुणस्तरीय र प्रभावकारी रूपमा सम्पन्न गर्न सम्बन्धितलाई निर्देशन पनि दिएका छन् । उनले भने, ‘विकास निर्माणका काममा नागरिकको निगरानी र अपनत्व जरुरी छ । जबसम्म नागरिकले निगरानी गर्दैनन्, तबसम्म निर्माणमा गुणस्तर कायम रहन सक्दैन ।’
विकास निर्माणमा समन्वय गर्दै आएका एमाले जिल्ला सदस्य तथा नगरयोजना आयोगका पूर्वसचिव मेघराज भट्टराईले समेत सांसद पौडेल, गिरी र अर्का संसाद भोजप्रसाद श्रेष्ठको अगुवाईमा भइरहेको योजनाको कार्यान्वयन स्थिति, बजेटको सदुपयोग र नागरिक अपनत्वको विषयमा निरीक्षण भएको जानकारी दिए । सडक डिभिजन कार्यालय बुटवलका सूचना अधिकारी इञ्जिनियर महेश्वर लम्सालले निर्माण व्यवसायीलाई तोकिएको समय (आगामी असार मसान्त) भित्रै निर्माण सक्नेगरी काम भइरहेको बताए । सडक निर्माण भएपछि मुख्य राजमार्गको बैकल्पीक सडकका रुपमासमेत प्रयोग गर्न मिल्ने गरी निर्माणको काम भइरहेको उनले बताए ।
स्थलगत निरीक्षणमा एमाले लुम्बिनी प्रदेश कमिटी सदस्य तथा बुटवल नगर इन्चार्ज गोपाल राना, बुटवल–१० का वडाध्यक्ष बलबहादुर पुन, एमाले बुटवल उपमहानगर कमिटी अध्यक्ष शोभाखर पोखरेल, क्षेत्र नम्बर २ का क्षेत्रीय संयोजक ऋषिराम पाण्डे, सह–संयोजक राजेन्द्र ढकाल, बिभिन्न टोल विकास संस्थाका अध्यक्ष, स्थानिय बासिन्दाहरु लगायतको सहभागीता रहेको थियो ।
समृद्ध बुटवलका लागि एकीकृत प्रयास
यो परियोजना बुटवलको नगर विकासको नमुना बन्ने दिशामा अघि बढेको छ । जनप्रतिनिधिहरुको समर्पण, प्राविधिक टोलीको संलग्नता र स्थानीय नागरिकको सक्रिय सहभागितामार्फत रामनगर अब एक ‘व्यवस्थित, सुरक्षित र हरित बस्तीको पहिचान’ बन्ने बाटोमा अग्रसर रहेको वडाअध्यक्ष पुनको दाबी छ ।
अध्यक्ष पुनले चालू आवमा अन्य विभिन्न योजनाहरु पनि कार्यान्वयन भइरहेको र आगामी आवका लागि संघीय र प्रदेश सरकारमा समेत थप योजनाका लागि आवश्यक बजेट विनियोजन गर्न अनुरोध गरिएको बताए । संघ, प्रदेश र स्थानीय सरकारको बजेटमा भइरहेका काममा वडाका सबै जनप्रतिनिधिहरु, टोलविकास संस्था र नागरिक अगुवाहरुको समन्वयमा कार्यान्वयन भइरहेको उनले बताए ।
