तुलसीराम पौडेल –
लुम्बिनी , माघ २४
रूपन्देहीको लुम्बिनी सांस्कृतिक नगरपालिकामा पाठेघरको मुखको क्यान्सर विरुद्ध खोप अभियान फागुन १ गतेदेखि ६ गतेसम्म सञ्चालन हुने भएको छ। महिलाको पाठेघरको मुखको क्यान्सर नहोस् भन्नका लागि कक्षा ६ देखि १० सम्मका छात्राहरु र विद्यालय नजाने १० वर्षदेखि १४ वर्षसम्मका छात्राहरूलाई क्यान्सर विरुद्धको खोप HPV लगाउने भएको हो। क्यान्सर विरुद्धको खोप HPV लगाउने कार्यक्रम सफल पार्नका लागि लुम्बिनी सांस्कृतिक नगरपालिकाको आयोजनामा नगरपालिका खोप समन्वय समितिका पदाधिकारीहरू, सरोकारवालाहरू ,खोप केन्द्र सञ्चालन हुने विद्यालयका प्रधानध्यापकहरू, सञ्चारकर्मी तथा पत्रकारहरूको लागि HPV खोप सम्बन्धी अभिमुखीकरण तथा अन्तरक्रिया कार्यक्रम सम्पन्न भयो। कार्यक्रमको सहजीकरण जनस्वास्थ्य अधिकृत धुर्वराज घिमिरे र जनस्वास्थ्य निरीक्षक राजेन्द्रप्रसाद चौधरीले गर्नुभएको थियो। कार्यक्रममा नगरपालिकाका सम्पूर्ण जनप्रतिनिधिहरू, प्रमुख प्रशासकीय अधिकृत ,सम्पूर्ण शाखा प्रमुखहरू ,खोप केन्द्र सञ्चालन हुने कक्षा ६ देखि १० सम्म अध्ययन गराइने विद्यालयका प्रधानध्यापकहरू ,सञ्चारकर्मी तथा पत्रकारहरू लाई पाटेघर रोग विरुद्धको खोप HPV सम्बन्धी अभिमुखीकरण कार्यक्रम सम्पन्न गरिएको थियो। 
खोप केन्द्र कार्यक्रम अन्तर्गत नगरपालिकाका १२ वटा स्वास्थ्य केन्द्र मार्फत ४९ वटा खोप केन्द्रबाट फागुन १ गतेदेखि ६ गतेसम्म खोप लगाइनेछ र खोप कार्यक्रमको अन्तिम दिन नगरपालिकाका स्वास्थ्य संस्थाहरूबाट खोप सञ्चालन गरिने नगरपालिका स्वास्थ्य शाखा प्रमुख जनस्वास्थ्य अधिकृत धुर्वराज घिमिरेले बताउनुभयो ।खोप सञ्चालनको लागि ६२ जना स्वास्थ्यकर्मी र १२४ जना स्वयंसेवक परिचालन गरिने स्वास्थ्य प्रमुख घिमिरेले बताउनुभयो ।नगरपालिकाका कक्षा ६ देखि १० सम्मका र विद्यालय नजाने १० देखि १४ वर्षसम्मका गरी ४,६११ जनालाई HPV खोप लगाउने लक्ष्य राखिएको नगरपालिकाले जनाएको छ। नगरपालिका प्रमुख सजरुद्दिन मुसलमानको अध्यक्षता, स्वास्थ्य शाखा प्रमुख जनस्वास्थ्य अधिकृत धुर्वराज घिमिरेको स्वागत मन्तव्य तथा कार्यक्रमको उद्देश्यमाथि प्रकाश रहेको कार्यक्रममा नगर प्रवक्ता तथा वडा नम्बर २ का वडा अध्यक्ष इनामुल्लाह फकिर ,नगरपालिका प्रमुख प्रशासकीय अधिकृत तारा ज्ञवाली ,प्रधानाध्यापक एलियस मोहम्मद ,शिक्षा शाखा सहायक प्रमिलापछ्याई लगायतले शुभकामना मन्तव्य दिनुभएको थियो।
कार्यक्रमको संचालन जनस्वास्थ्य निरिक्षक राजेन्द्र प्रसाद चौधरीले गर्नुभएको थियो ।
