बुटवल, माघ २६ । सञ्जीवनी टोल विकास संस्था र सञ्जीवनी सामुदायिक संस्था बुटवल–११ को संयुक्त आयोजनामा शनिबार नेतृत्व विकास, उद्घोषण तथा लेखा तालीम सम्पन्न भएको छ । टोलबासीको क्षमता विकास गराउने उद्देश्य सहित एक दिने तालीम आयोजना गरिएको हो । सो अवसरमा बोल्दै बुटवल उपमहानगरपालिकाका वडा नम्बर ११ का वडा अध्यक्ष रामचन्द्र क्षेत्रीले तालीममा सिकेका सबै कुराहरुलाई व्यवहारमा उतारेर लागू गर्न आग्रह गरे । उनले तीन वटै तालीमका विषय उपयोगी रहेको भन्दै नेतृत्व र व्यक्तित्व विकासमा सूचक बन्ने बताए । कार्यक्रममा पेरी अर्वान समन्वय समितिका उपाध्यक्ष लक्ष्मी विकले तालीम अति आवश्यक र महत्वपूर्ण भएको बताइन ।
उद्घोष तथा कार्यक्रम सञ्चालनको विषयमा टोलका सल्लाहकार नरेन्द्रकुमार शर्मा, लेखामा सल्लाहकार रेवन्त विश्वकर्मा र समूह व्यवस्थापनमा सञ्जीवनी टोल विकास संस्थाका अध्यक्ष हरि गहतराजले प्रशिक्षण दिएका थिए । तालीममा ५० जनाको सहभागिता रहेको थियो । सञ्जीवनी टोल विकास संस्थाका अध्यक्ष हरि गहतराजको अध्यक्षता, सञ्जीवनी सामुदायिक संस्थाका अध्यक्ष चम्पा गहतराजको स्वागत तथा सञ्जीवनी टोल विकास संस्थाका सचिव देवीका मास्कीको सञ्चालनमा कार्यक्रम सम्पन्न भएको थियो । कार्यक्रमको संयोजकमा गणेश थापा र सुनिरा गुरूङ रहेका थिए ।
