बुटवल । बिटिआई ट्रेड्समेन एसोसिएसन (बिटा) को २०औँ वार्षिक साधारणसभा तथा १२ औँ राष्ट्रिय भेला शनिबार बुटवलमा सम्पन्न भएको छ । साधारणसभाको बुटवल टेक्निकल इन्स्टिच्यूट (बिटिआई) को पहिलो वर्षका विद्यार्थी डा.सिमोन पाण्डेले उद्घाटन गरे । सोही अवसरमा बोल्दै उनले अहिलेको शिक्षा प्रणाली परिमार्जन गरी प्राविधिक विषयलाई अनिवार्य गर्न सकिए मुलुकमा प्राविधिक जनशक्ति उत्पादन बढ्नुका साथै युवाशक्ति विदेश पलायन हुने क्रम पनि न्यूनीकरण हुने बताए । प्राविधिक शिक्षाको महत्व नबुझ्दा उच्च शिक्षाका लागि यहाँका विद्यार्थीहरु विदेश पलायन भइरहेको उनको भनाइ थियो ।
कार्यक्रममा बुटवल उपमहानगरपालिकाकी उपप्रमुख सावित्रादेवी अर्यालले बुटवल शिक्षाको हव बनेको र टेक्निकल शिक्षामा नयाँ योजनाका साथ अघि बढ्नुपर्ने बताइन् । उपमहानगरपालिकाले प्राविधिक तथा सीपमूलक शिक्षालाई नीति तथा कार्यक्रममै समावेश गरेर प्राथमिकतामा राखेको उनको भनाइ थियो ।
यस्तै रुपन्देही उद्योग संघका अध्यक्ष दिलिप सापकोटा, बुटवल उद्योग वाणिज्य संघका पूर्वअध्यक्ष उज्जवल कसजू, बुटवल उपमहानगरपालिका वडा नम्बर ४ का वडाध्यक्ष नरिश्वर पौडेललगायतले बोल्दै व्यावहारिक, व्यावसायिक र सीपमूलक शिक्षाको खाँचो बढ्दै गएका बेला प्राविधिक शिक्षामा राज्यले लगानी बढाउनुपर्ने बताए ।
बिटिआई ट्रेड्समेन एसोसिएसनका अध्यक्ष प्रदिप गिरीले वार्षिक प्रतिवेदन प्रस्तुत गर्दै आगामी योजना तथा कार्यक्रमहरुबारे जानकारी गराए । विसं. २०५८ सालमा स्थापना भएको बिटिआई ट्रेड्समेन एसोसिएसन, बुटवल टेक्निकल इन्स्टिच्यूट (बिटिआई) मा अध्ययन गरिरहेका र पासआउट भएका विद्यार्थीहरुको संस्था हो । कार्यक्रम उपाध्यक्ष गुप्तबहादुर पुनको स्वागत तथा उपमहासचिव विष्णुबहादुर रानाको सञ्चालनमा सम्पन्न भएको थियो ।
सामुदायिक प्राविधिक शैक्षिक संस्था बिटिआई विसं. २०२० मा युनाइटेड मिसन टु नेपाल (युएमएन) नर्वेका इन्जिनियर ओड होफ्टनको नेतृत्वमा स्थापना गरिएको थियो । प्राविधिक प्रशिक्षणको लागि बिटिआईको स्थापना भएको र अहिले उत्पादन–आधारित चारवर्षे प्रशिक्षण कोर्षमा अध्ययन भइरहेको छ । बिटिआइले मेकानिकल, इलेक्ट्रिकल, सिकर्मी र वेल्डिङ तथा महिला कौशल विकास कार्यक्रम जस्ता विशेष समुदाय–आधारित पाठ्यक्रमहरू पनि प्रदान गरिरहेको छ ।
