तुलसीराम पौडेल
बुटवल ,फाल्गुन १३
सर्वमान्य ज्योतिस्वरु परमात्मा शिवको दिव्य अवतरणको यादगार दिवस महान पर्व महाशिवरात्रीको पावन अवसरमा आयोजित सुखद एवं सुन्दर जीवनका लागि आध्यात्मिक सशक्तिकरण विषयक अभिप्रेरक प्रशिक्षण कार्यक्रम रूपन्देहीको बुटवल १२ स्थित ग्लोबल पिस रिट्रिट सेन्टर ढवाहा मा सम्पन्न भयो। कार्यक्रम ब्रह्मकुमारी ईश्वरीय विश्वविद्यालय क्षेत्रीय कार्यालय बुटवलको आयोजनामा भएको हो। लुम्बिनी प्रदेश मुख्यमन्त्री चेतनारायण आचार्यले कार्यक्रमको उद्घाटन गर्नुभयो। सो अवसरमा मुख्यमन्त्री आचार्यले बोल्दै मानिसलाई चरित्रवान तथा आत्मावान बनाउने कार्यमा ईश्वरीय विश्वविद्यालयको महत्त्वपूर्ण भूमिका रहेको बताउनुभयो।
ब्रम्हाकुमारी ईस्वरीय विश्वविद्यालय नेपालकि सहसचिव तथा क्षेत्री कार्यालय बुटवलकी अध्यक्ष ब्रह्मकुमारी कमला दिदीले शिवरात्री पर्वको यथार्थ रहस्यबारे स्पष्ट पार्नुभएको थियो। “शिवरात्री” शब्द राति छ तर दिनमा किन मनाइन्छ भने धेरैजसो अपराधिक क्रियाकलापहरू नराम्रा कामहरू, गुप्त कामहरू ,डरलाग्दो क्रियाकलापहरू रातमा हुने गर्छन् । । रातलाई कालो अथवा नराम्रो संकेतको रुपमा लिइन्छ तर अहिले कलियुगको अन्तिममा मान्छेले दिनमै पनि अपराधिक क्रियाकलापहरु , मान्छे मतिभ्रष्ट हुने, लागू पदार्थ सेवन गर्ने ,जाँडरक्सी खाने, अरुको कुभलो सोच्ने, जस्ता नकारात्मक क्रियाकलापले विश्व समाज प्रदुषित भएको छ। त्यसैले वर्तमान विश्व समाजलाई सकारात्मक मूल्यनिष्ठ संस्कारिक बनाउनका लागि परमधाम निवासी परमसत्य परमात्मा अवतरण भइसक्नुभएको छ।
आम सम्पूर्ण मानिसहरुले सर्वशक्ति भगवानलाई प्रतक्षिकरण गरेर उहाँका गुणहरूलाई हामीले लिएर समाजलाई नैतिक ,संस्कारिक ,चारित्रिक बनाउनुपर्छ। सकारात्मक मूल्यनिष्ठ समाजको निर्माण आजको टड्कारो आवश्यकता हो भन्ने धारणा ब्रह्मकुमारी कमला दिदीले राख्नुभएको थियो। साथै उहाँले राजयोग मेडिटेसनको अभ्यासले समाज र देशलाई रूपान्तरण गर्न आवश्यक छ भन्ने कुरामा जोड दिनुभयो।
प्रमुख प्रशिक्षक ब्रह्माकुमारी ईश्वरीय विश्वविद्यालय नेपाल वरिष्ठ राजयोग प्रशिक्षक ब्रह्मकुमार राजु घलेले मानिसको भाग्य विधाता स्वयं आफै मानिस नै हो। भाग्य विधाताले कोर्ने होइन स्वयं आफैले असल कर्म गरेर भाग्य कोर्नुपर्ने बताउनुभयो ।कार्यक्रममा सांसद भोजप्रसाद श्रेष्ठ, बुटवल उपमहानगरपालिका प्रमुख खेलराज पाण्डे, च्याम्बर अफ कमर्स प्रदेश प्रमुख टंकप्रसाद पोखरेल, शुद्दोधन गाउँपालिका अध्यक्ष विष्णुप्रसाद बस्याल लगायत विभिन्न जनप्रतिनिधिहरूको आतिथ्यता रहेको थियो। ब्रह्मकुमारी ईश्वरीय विश्वविद्यालय नेपालकी सह निर्देशक तथा क्षेत्रीय कार्यालय बुटवलकी अध्यक्ष ब्रह्मकुमारी कमला दिदीको अध्यक्षता ,लुम्बिनी प्रदेश मुख्यमन्त्री चेतनारायण आचार्यको प्रमुख आतिथ्यता ,ब्रह्मकुमारी ईश्वरीय विश्वविद्यालय नेपाल केन्द्रीय सदस्य एवं क्षेत्रीय कार्यालय बुटवलका सचिव ब्रह्मकुमार नारायण दाजुको स्वागत मन्तव्य रहेको कार्यक्रमको सञ्चालन ब्रह्मकुमार भरत पौडेलले गर्नुभएको थियो।
