बुटवल । तिलोत्तमा–३, शंकरनगरस्थित सामूहिक विकास बचत तथा ऋण सहकारी संस्थाले संशोधित ऐन तथा एकिकरण सम्बन्धी अन्तक्र्रिया कार्यक्रम सम्पन्न गरेको छ । ६८औं राष्ट्रिय सहकारी दिवसका अवसरमा मर्यादित सहकारीः समुन्नत समाज भन्ने नाराका साथ रुपन्देहीका विभिन्न बचत तथा ऋण सहकारी संस्थाहरुकाबीचमा कार्यक्रम आयोजना गरीएको हो ।
कार्यक्रममा सरकारले जारी गरेको सहकारी सम्बन्धी ऐन संशोधन सम्बन्धी अध्यादेशबाट प्रतिस्थापन भई विधेयकको रुपमा संसदमा स्वीकृत प्रकृयामा रहेको सहकारी ऐनमा भएका संशोधित व्यवस्थाहरु तथा सहकारी संस्था एकिकरण सम्बन्धी अन्तरक्रिया गरीएको थियो । कार्यक्रममा राष्ट्रिय सहकारी महासंघ लिमिटेडका लेखा सुपरीवेक्षण समितिका संयोजक भिमप्रसाद तुलाचनले केहि सहकारीहरुको वदमासिको कारण समग्र सहकारी अभियानले मुल्य चुकाउनु पर्ने अवस्था सृजना भएको बताए । अहिले आएको अध्यादेशमा भएका कमी कमजोरीहरु बहस पैरवी मार्फत संशोधनका लागि प्रयत्न गर्ने कार्यमा सहकारी महासंघ लागिरहेको उनले बताए ।
संस्थाका अध्यक्ष सुरेन्द्रकुमार वर्माले रुपन्देहीमा वचत तथा ऋणको कारोवार गर्ने जेठो संस्था भएको नाताले यस संस्थाले सहकारी संस्थाहरुलाई नीति तथा कानुनको अद्यावधिक गराउने दायित्व समेत महसुस गरी यो कार्यक्रमको आयोजना गरीएको बताए । अध्यक्ष वर्माले सानो सानो समुह बनाएर कार्य गर्दा सहकारी अभियान कमजोर हुने हुँदा उद्देश्य मेल खाने सहकारी संस्थाहरु एकिकरणका लागि सहकार्य गर्नका लागि समेत आवहन गरे ।
कार्यक्रममा सहजकर्ता सिद्धार्थनगर नगरपालिकाका प्रशासन तथा सहकारी विभाग प्रमूख कमलकान्त खनालले संशोधित सहकारी ऐनका भएका व्यवस्थाहरु र यसले सहकारी क्षेत्रलाई पार्ने प्रभावबारे जानकारी गराएका थिए । कार्यक्रममा सामूहिक विकास साकोसका प्रमूख कार्यकारी अधिकृत देवराज ज्ञवालीले संस्थाबारे जानकारी गराएका थिए ।
उक्त कार्यक्रममा बिभिन्न २५ वटा सहकारी संस्थाका अध्यक्ष तथा व्यवस्थापन प्रमुखहरुको सहभागिता रहेको सूचना अधिकारी ईश्वरी मरासिनीले जानकारी दिए । संस्थाका सञ्चालक समिति सदस्य भूमिलाल सापकोटाको स्वागत तथा सचिव मिनप्रसाद पोख्रेलको सञ्चालनमा कार्यक्रम सम्पन्न भएको थियो ।
