टोपलाल अर्याल

गुल्मी । गुल्मीमा अन्तराष्ट्रिय सहकारी दिवसले सहकारी अभियान र अभियान्तामा उर्जा भरेको छ । भने विभिन्न क्षेत्रमा उत्कृष्ट काम गरिरहेका जिल्लाका चार सहकारी संस्थाले सम्मान पाएका छन् । दिवसले २८ सहकारी र सहकारीकर्मीलाई जुटायो । यसले भावना र एकतामा बल थप्यो । सडकभरी देखिएका संचालक, शेयरधनी र सरोकारवालाबाट सहकारीको प्रतिष्ठामा अझ इटा थपियो ।

कार्यक्रममा उत्कृष्ट काम गर्ने सहकारीलाई लुम्बिनी प्रदेशका अर्थमन्त्री धनेन्द्र कार्की र प्रदेश सभा सदस्य डिल्लीराज भुसालले सम्मान तथा पुरस्कृत गरे । यसले अरुलाइ पनि राम्रो गर्ने हौसला मिल्यो । बहुउदेश्यीय सहकारीतर्फ मैत्री बहुउदेश्यीय सहकारी संस्था पुरस्कृत भएको छ । भने महिला सहकारीतर्फ अमरकल्याण महिला विकास बहुउदेश्यीय सहकारी संस्था र बचत ऋण सहकारीतर्फ लेकाली स्वावलम्वन बचत तथा ऋण सहकारी संस्थालाई पुरस्कृत गरिएको जिल्ला सहकारी संघ गुल्मीका अध्यक्ष यम बहादुर थापाले जानकारी दिए ।

त्यस्तै कृषि सहकारी तर्फ बाँसखर्क कृषि सहकारी संस्था पुरस्कृत भएको छ । पुरस्कृत हुने मैत्री सहकारी संस्था २०५७ सालमा स्थापना भएको थियो । १४ हजारभन्दा बढी सेयर सदस्य रहेको सहकारीमा पुँजी ५८ करोड र २० वटा शाखा कार्यालय रहेका छन् । त्यस्तै २०६२ सालमा स्थापना भएको अमरकल्याण महिला सहकारीले सहकारी गतिविधीका अतिरिक्त अल्पकालिन आश्रय केन्द्र संचालन गरेर हिंसा पीडित महिलाहरुलाई आश्रय र उचित मार्ग निर्देशन गर्ने काम गरिरहेको छ ।
२०५० सालमा स्थापना भएको लेकाली स्वावलम्बन बचत तथा क्रृण सहकारीमा हाल चार हजार ३९ सेयर सदस्य छन् । सहकारीमा हाल ६८ करोड रुपियाँ बढीको कारोबार छ । दिवसको अवसरमा आयोजित कार्यक्रममा जिल्ला सहकारी संघ गुल्मीको नेतृत्वमा सवै सहकारीहरुको प्रतिनिधित्व रहेको थियो । जिल्ला सहकारी संघका अध्यक्ष थापाका अनुसार जिल्लामा दर्ता भएका ४४१ सहकारी संस्थाहरु रहेका छन् । दिवसमा २८ सहकारी व्यानरसहित सहभागी भएको थापाले बताए । उहाँले सात सय बढि व्यक्तहरुको सहभागीतामा कार्यक्रम भव्य भएकाले सहकारी अभियानमा उर्जा थप्ने काम भएको बताए ।

कार्यक्रमलाई संबोधन गर्दै लुम्बिनी प्रदेशका अर्थमन्त्री धनेन्द्र कार्कीले सवै सहकारीलाई एउटै डालोमा राखेर हेर्न नहुने भन्दै शहरका ठुला सहकारीमा समस्या देखिएपनि गाउँका कुनै समस्या नरहेको बताए । साना उद्यम संचालन र समस्या समाधान सहकारीको ठूलो भूमिका भएकाले सवैको सहयोग र उर्जालेनै सहकारी राम्रो हुने कार्कीको भनाइ छ ।

लुम्बिनी प्रदेशका सासंद डिल्लिराज भुसालले गाउँमा सहकारीले मान्छेहरुका भावनालाई एकिकृत गर्दै संगठित र आर्थिक सहयोग मार्फत उद्यममा जोडने काम गरेको बताए । देशभर सहकारीका विरुद्ध आन्दोलन र राष्ट्रिय मुद्धा बनिरहेका छन । तर, गाउँमा सहकारीको उर्जा घट्दैभन्दा बढ्दै गरेको सन्देश दिवसमा दिन सकिएको मैत्री बहुउदेश्यीय सहकारी संस्थाका अध्यक्ष शंकर प्रसाद गौतमले बताए ।