तुलसीराम पौडेल
सियारी,भाद्र १२
नेपाली कांग्रेसका केन्द्रिय सदस्य तथा पुर्व गृहमन्त्री बालकृष्ण खाणले थारु समुदाय नेपालको मौलिक पहिचान बोकेको समुदाय भएको भन्दै यसको संरक्षण, संवद्र्धन र अधिकार सुनिश्चिततामा सबै एकजुट हुनुपर्ने बताउनु भएको छ । उहाले आगामी दिनमा थारु भाषालाई लुम्बिनी प्रदेशको सरकारी भाषाको रुपमा स्थापित गर्न पार्टीको तर्फबाट निर्देशन दिनु भएको छ । नेपाल थारु संघ रुपन्देहीले रुपन्देहीको सियारीमा बिहीबार आयोजना गरेको बिस्तारित भेला तथा कार्यक्रममा बोल्दै खांणले यस्तो निर्देशन दिनु भएको हो । उहाले प्रदेशसभाबाट बिधानलाई पास गराउन पार्टीका सम्बन्धित ब्यक्तिहरुलाई आग्रह गर्नु भएको छ । उहाले थारु भाषालाई सरकारी कामकाजको भाषा स्थापित गर्नु सबैको लागी सम्मानको बिषय भएको बताउदै यसलाई लुम्बिनी प्रदेश सरकारले पनि सकरात्मक रुपमा लिने बिश्वास ब्यक्त गर्नु भएको छ । पुर्व गृहमन्त्री खांणले थारु समुदायको हक–हितमा नेपाली कांग्रेस सधैं प्रतिबद्ध रहँदै आएको उल्लेख गर्दै, “थारु समाजको अधिकार र पहिचानलाई संरक्षण गर्न कांग्रेसले अग्रणी भूमिका खेल्दै आएको बताउदै भविष्यमा पनि खेलिरहनेछ,” भन्ने विश्वास दिलाउनु भएको छ ।
उहाले आगामी कार्तिक १७ गते हुने उपनिर्वाचनलाई ऐतिहासिक अवसरका रूपमा लिनुपर्ने बताउँदै नेपाली कांग्रेसलाई विजयी बनाउन सबै थारु समुदाय एकजुट भएर मतदानमा सहभागी हुनुपर्नेमा जोड दिनु भएको छ । “लोकतन्त्र र समावेशी संविधान कांग्रेसकै नेतृत्वमा आएको हो, त्यसैले यो पार्टी नै सबै समुदायको साझा घर हो,” खाणले भन्नु भयो ।
त्यस्तै गरी नेपाली कांग्रेसका केन्द्रिय सदस्य उदय समशेर जबराले पार्टीभित्र थारु समुदायको सक्रियताले संगठनलाई थप सबल बनाएको उल्लेख गर्दै समुदायको अधिकार सुनिश्चिततामा कांग्रेस सधैं अग्रपंक्तिमा रहने बताउनु भएको छ । उहाले, “थारु समुदाय नेपालको लोकतान्त्रिक आन्दोलनको अभिन्न अंग भएको जोड दिदै यसको योगदानलाई कदर गर्दै अधिकार र पहिचान सुरक्षित गर्न कांग्रेसले निरन्तर साथ दिने प्रतिबद्धता गर्नु भएको छ ।
यस्तै गरी भेलामा लुम्बिनी प्रदेशका पुर्व मुख्यमन्त्री दिल्ली बहादुर चौधरीले थारु समुदायको अधिकार र पहिचानको सवाल केवल नारामा सीमित नभई व्यवहारमा लागू गर्नुपर्नेमा जोड दिनु भएको छ । उहाले “थारु समुदायले ऐतिहासिक संघर्ष गरेर पहिचान र अधिकारको जग बसालेको बताउदै अब यसलाई संस्थागत गर्दै आगामी पुस्तालाई हस्तान्तरण गर्नु हाम्रो सामूहिक जिम्मेवारी भएको उल्लेख गर्नु भयो ।
यस्तै गरी नेपाल थारु संघ रुपन्देहीका सभापति चन्द्रभान चौधरीले थारु समुदायको हकअधिकार, संस्कृति र पहिचान संरक्षणका लागि संघ निरन्तर क्रियाशील रहेको उल्लेख गर्दै जिल्लाका सबै थारु समुदायलाई एउटै छातामुनि एकजुट भई अघि बढ्न आग्रह गर्नु भएको छ । उहाले संघका कार्यक्रमलाई अझ प्रभावकारी बनाउन सबैको सहकार्य आवश्यक रहेको बताउनु भयो ।
नेपाल थारु संघका केन्द्रिय सदस्य तथा नेपाली कांग्रेस महाधिवेशन प्रतिनिधि सन्तराम थारुको स्वागत मन्तब्य रहेको कार्यक्रममा नेपाली कांग्रेस केन्द्रिय सदस्य एवं पुर्व सांसद योगेन्द्र थारु, नेपाली कांग्रेसका केन्द्रिय सदस्य तथा पुर्व मन्त्री गोपाल दहित थारु, नेपाली कांग्रेसका केन्द्रिय सदस्य एवम पुर्व मन्त्री रामजनम चौधरी, नेपाली कांग्रेस क्षेत्र नं. ३ का सभापति सुशील गुरुङ, नेपाली कांग्रेस जिल्ला उपसभापति एवं सियारी गाउँपालिकाका अध्यक्ष थानेश्वर घिमिरे, लुम्बिनी प्रदेश सभा सदस्य देवी प्रसाद चौधरी, नेपाल महिला संघ केन्द्रिय सदस्य पुस्पा चौधरी थारु, नेपाल थारु संघका केन्द्रिय अध्यक्ष शिवनारायण महतो थारु, नेपाली कांग्रेस रुपन्देहीका सभापति रामकृष्ण खाण, नेपाली कांग्रेस लुम्बिनी प्रदेश सभापति अमरसिह पुन लगायतका नेताहरुले शुभकामना मन्तव्य राख्नु भएको थियो । कार्यक्रमको संचालन नेपाल थारु संघ रुपन्देहीका सचिव पल्टन थारुले गर्नु भएको थियो ।
कार्यक्रममा नेपाल थारु संघका बिभिन्न जिल्लाका प्रतिनिधी, नेपाली कांग्रेसका पदाधिकारी, पार्टीका नेता तथा कार्यकर्ता, लगायत रुपन्देहीका विभिन्न तहका थारु समुदायका प्रतिनिधिहरू, समाजसेवी, राजनीतिकर्मी तथा सरोकारवाला निकायहरूको उल्लेख्य सहभागिता रहेको थियो ।
