बुटवल । मेचीकाली सन्देश प्रकाशन प्रालिको २१ औं वार्षिक साधारणसभा तथा सातौं अधिवेशन शुक्रबार बुटवलमा सम्पन्न भएको छ । सधारणसभाले विगतको सफल यात्रालाई आत्मसात् गर्दै भविष्यमा अझ सबल, प्रभावकारी र व्यावसायिक रूपमा अघि बढ्ने स्पष्ट प्रतिबद्धता व्यक्त गरेको छ ।

सभामा प्रस्तुत प्रतिवेदनले हालको आर्थिक मन्दी, विज्ञापन बजारमा आएको सुस्तता, सामाजिक सञ्जालको बढ्दो प्रयोग र मुद्रण सामग्रीको मूल्यवृद्धिलाई चुनौतीका रूपमा औंल्याउँदै त्यसका बाबजुत पनि पूर्ण व्यावसायिक र सकारात्मक पत्रकारितालाई नै आत्मसात् गरिने प्रतिबद्धता जनाएको छ । चुनौतीबिच पनि मेचीकालीले आफ्ना उपलब्धि जोगाउँदै भविष्यमा अझ प्रगति गर्ने संकल्प व्यक्त गरेको अध्यक्ष होमराज बस्यालको भनाइ छ ।

सभाको उद्घाटन गर्दै प्रदेश सांसद तथा पूर्वमन्त्री भोजप्रसाद श्रेष्ठले मेचीकाली सन्देशले विगतदेखि नै आमसञ्चारलाई असली र जिम्मेवार माध्यमका रूपमा अगाडि बढाएको उल्लेख गर्दै आगामी दिनमा अझ प्रभावकारी भूमिका निर्वाह गर्ने विश्वास व्यक्त गरे ।

उनले विशेष गरी अनलाइन संस्करणलाई अझ छरितो, छिटो र व्यावसायिक बनाउनुपर्नेमा जोड दिँदै मेचीकालीको सकारात्मक यात्रालाई निरन्तरता मिलोस् भन्ने शुभकामना दिए । सभामा अध्यक्ष बस्यालले आर्थिक वर्ष २०८१÷८२ को प्रतिवेदन प्रस्तुत गर्दै संस्थाको आर्थिक, व्यवस्थापकीय र सम्पादकीय अवस्थाबारे जानकारी गराएका थिए ।

प्रतिवेदनमा हाल देशको आर्थिक मन्दी, विज्ञापन बजारमा आएको ठप्पावस्था, सामाजिक सञ्जालको बढ्दो प्रयोग, कागज–मसीको मूल्यवृद्धि र सहज आपूर्ति नहुनु प्रमुख चुनौतीका रूपमा उल्लेख गरिएको थियो । यद्यपि, स्वस्थ प्रतिस्पर्धा गर्दै प्राप्त उपलब्धि जोगाउँदै संस्थालाई अझ मजबुत बनाउन अग्रसर रहने अध्यक्ष बस्यालको भनाइ थियो ।

साधारणसभामा सञ्चालक तथा शेयर सदस्यहरु वसन्तराज खनाल, बाबुराम भट्टराई, एजाज आलमलगायतले शुभकामना मन्तव्य दिएका थिए । कार्यक्रमको सञ्चालन प्रमुख कार्यकारी अधिकृत विष्णु गैरेले गरेका थिए ।

प्रतिवेदनअनुसार प्रिन्ट मिडियासँगै अनलाइन संस्करणलाई अझ सशक्त बनाउने, वितरण प्रणाली सुदृढ गर्ने, अन्य पत्रिकाको छपाइमार्फत वैकल्पिक आम्दानी खोज्ने, जग्गा–सम्पत्ति संरक्षण गर्नेलगायतका योजना अघि सारिएका छन् । सभाको अन्त्यमा अध्यक्ष बस्यालले संस्थाको आजको सफलता र यात्रा शेयर सदस्य, विज्ञापनदाता, कर्मचारी, पाठक तथा शुभेच्छुक सबैको निरन्तर सहयोगकै कारण सम्भव भएको भन्दै भविष्यमा पनि सहयोग र मार्गदर्शनको अपेक्षा व्यक्त गरे ।

निरन्तर ‘क’ वर्गमा सूचीकृत
सन् २०५७ साल मंसिरमा स्थापना भएको मेचीकाली हालसम्म प्रेस काउन्सिलको वर्गीकरणमा ‘क’ श्रेणीमा सूचीकृत रहन सफल मेचीकाली सन्देश दैनिकले निरन्तर सकारात्मकता, पेशागत आचारसंहिता र जिम्मेवार पत्रकारितामा प्रतिबद्ध रहेको अध्यक्ष बस्यालले प्रतिवेदनमार्फत उल्लेख गरे ।

नयाँ नेतृत्व सर्वसम्मत
मेचीकाली प्रकाशन प्रालिको २१ औं साधारणसभा तथा अधिवेशनले नयाँ नेतृत्व सर्वसम्मत चयन गरेको छ । अधिवेशनको शुक्रबारै बसेको बन्द सत्रले नयाँ सञ्चालक समिति सर्वसम्मत चयन गरेको हो । नयाँ नेतृत्वमा पुनः होमराज बस्याल अध्यक्ष सर्वसम्मत चयन भएका छन् । समितिमा वसन्तराज खनाल, तेजकुमार पाठक, देवन्द्रप्रसाद ध्वजू, आदित्यनारायण कसौधन, रेनुका खरेल, गोपाल राना, बालाराम भट्टराई र यमलाल लोहनी सदस्य चयन भएको अध्यक्ष मण्डलका प्रमुख आदित्यनारायण कसैधनले जानकारी दिए ।