बुटवल । रुरुक्षेत्र गाउँपालिकामा अध्यक्ष यदु ज्ञवालीले बेथिति, पूर्वाग्रही व्यवहार र अनियमितता गर्न खोजेको आरोप गाउँपालिका उपाध्यक्षसहित नेकपा एमालेका निर्वाचित जनप्रतिनिधि र स्थानीयहरूले सार्वजनिक रूपमा उठाएका छन् ।
अध्यक्ष ज्ञवालीले पालिकालाई लोकप्रियता कमाउने खेलो र व्यक्तिगत स्वार्थको केन्द्र बनाउन खोजेको भन्दै नेकपा एमाले रुरुक्षेत्र गाउँ कमिटीले संस्थागत रूपमा आपत्ति जनाएको छ ।
बुटवलमा नेकपा एमाले रुरु–रूपन्देही सम्पर्क मञ्चको शनिबार सम्पन्न अन्तरक्रिया कार्यक्रममा बोल्ने अधिकांश वक्ताले अध्यक्ष ज्ञवाली कामभन्दा सस्तो प्रचारबाजी, राजनीतिक पूर्वाग्रह र आर्थिक अनियमिततामा संलग्न रहेको आरोप लगाए ।
उनीहरूले पालिकाका प्रमुख प्रशासकीय अधिकृत लक्ष्मण पाण्डेलाई पनि राजनीतिक पक्षपात गर्दै अध्यक्षलाई साथ दिएको दाबी गरे । यी दुबै जनालाई पूर्वाग्रहभन्दा माथि उठेर अभिभावकीय तहको पदीय भूमिका निर्वाह गर्न र बेथितिको नैतिक जिम्मेवारी लिन स्थानीय अगुवाहरुले आग्रह गरेका छन् ।
नेकपा एमाले जिल्ला कमिटी सचिवालय सदस्य तथा क्षेत्रीय समन्वय समिति संयोजक शेष नारायण पौडेलले स्मार्ट बोर्ड खरिद प्रक्रियामा देखिएको गम्भीर अनियमितताको विवरण प्रस्तुत गर्दै दोषीलाई कारबाही गर्न माग गरे ।
उनका अनुसार, ३५ लाख रुपैयाँमा ७ वटा विद्यालयमा स्मार्ट बोर्ड खरिद गर्ने निर्णय भए पनि प्रक्रिया मिचेर गुपचुप ढंगले जडान गरियो र नक्कली कागजात प्रयोग गरी १० लाखभन्दा बढी रकम अनियमित गर्न खोजिएको प्रमाणसहित सार्वजनिक भइसकेको छ । पौडेलसहितका जनप्रतिनिधिहरुले बेथितिका फेहरिस्त प्रमाणसहित प्रस्तुत गरेका थिए । उनीहरुले जिल्लामा भएका सञ्चारमाध्यमहरुलाई तथ्यका आधारमा सत्य स्थापित गर्न आग्रह गरिएको बताएका छन् ।
विद्यालयहरूले असहमति जनाएपछि पुनः प्रक्रियागत ढंगले खरिद गर्ने निर्णय भए पनि अध्यक्ष र प्रमुख प्रशासकीय अधिकृतले अवरोध गर्ने प्रयास गरेको पौडेलले बताए । सो विषयमा आवाज उठाउने नागरिकमाथि मानहानी मुद्दा हालिनु अनियमितता छोप्ने हतकण्डा भएको उनको आरोप थियो । सबै विषयको तथ्य प्रमाण रहेको र त्यसलाई सम्बन्धित ठाउँमा समेत पठाइएको र अध्यक्षलाई लिखित रुपमै पेश गरिएको पनि उल्लेख गरे ।
गाउँ कमिटी अध्यक्ष फर्शुराम ज्ञवाली, उपाध्यक्ष मिनादेवी गौतम, सम्पर्क मञ्चका संस्थापक अध्यक्ष हेम थापा, अध्यक्ष षडानन्द पोख्रेल, वडा अध्यक्षहरू मोतिप्रसाद श्रेष्ठ, घनश्याम अर्याल, नवराज बिक, पार्टीका वडा कमिटी अध्यक्ष बिमल ज्ञवालीलगायतले अध्यक्ष ज्ञवालीको एकलौटी, स्वार्थी र गैरजनप्रतिनिधि शैलीले गाउँपालिकाको साखमा धक्का पुगेको बताएका छन् । उनीहरुले पालिका अध्यक्षले हाकिमलाई अनेक प्रभावमा पारेर पूर्वाग्रही रुपमा साधन स्रोतको समेत दुरुपयोग गर्ने गरेको अरोप लगाएका छन् ।
उनीहरूले पालिकामा सीमित स्रोत साधनको दुरुपयोग हुनु गम्भीर समस्या भएको भन्दै अध्यक्ष र प्रमुख प्रशासकीय अधिकृतले नैतिक जिम्मेवारी लिनुपर्ने माग गरे । यस्तो माग पालिकाका अध्यक्ष र हाकिम दुबैलाई लिखित रुपमा पेश गरिएको उनीहरुको भनाइ थियो ।
स्थानीय अगुवा, राजनीतिक दलका प्रतिनिधि, अरु जनप्रतिनिधि समेतलाई साथमा लिएर आफुहरुले धेरै समय धैर्य गरेको, संयमित रहेर अनुशासित शैली प्रदर्शन गरेको, सूचनाको हक स्वरुपम यथार्थ विवरण माग गरेको, कमीकमजोरी गरेका तथ्यहरुसहित संवादबाट समाधान निकाल्ने प्रयासलाई पालिका अध्यक्षले कमजोरीको रुपमा लिएको एमाले पालिका अध्यक्ष फर्शुरामको गुनासो छ । उनले पालिका अध्यक्षले पदीय मर्यादा नै राख्न नसकेको, स्टण्ड र रवाफमा रमाउन खोजेको आरोप लगाए । स्थानीयले समेत अध्यक्षको हैकमिपूर्ण व्यवहार र बेथिति विरुद्ध एकजुट भई जनआवाज बुलन्द गर्नुपर्ने आवश्यकता औंल्याएको वडा नं. ४ का अध्यक्ष समेत रहेका युवा नेता मोती श्रेष्ठको भनाइ छ ।
रुरुक्षेत्र गाउँपालिकामा देखिएको बेथिति र अनियमितताविरुद्ध एमाले जनप्रतिनिधि, स्थानीयवासी र सम्पर्क मञ्चले उठाएको आवाज सुशासन, पारदर्शिता र जवाफदेहिताका लागि पालिका नेतृत्वलाई सदासयतासहितको विशेष आग्रह गरिएको बताउँदै सम्पर्क मञ्चका पूर्वअध्यक्ष थापाले पालिका अध्यक्षले नैतिक जिम्मेवारी लिन किन अलमल र तिगडम गरिरहेका छन् भन्दै प्रश्न गरे ।
