बुटवल। ग्याँस बिक्रेता संघ रुपन्देहीको १२ औं वार्षिक साधारण सभा तथा छैठौं अधिवेशन शनिबार बुटवलमा सम्पन्न भएको छ ।
अधिवेशनले कल्पना कुँवरको नेतृत्वमा १५ सदस्यीय कार्यसमिति निर्विरोध निर्वाचित गरेको छ । समितिको उपाध्यक्षमा राममिलन यादव र ज्ञानेन्द्र बन्जाडे, महासचिवमा सूर्य खनाल, सचिवमा प्रकाश तिवारी र कोषाध्यक्षमा सुनिता पाण्डे चयन भएका छन् । नवनिर्वाचित समितिमा विष्णु घिमिरे पन्थी, कमल अधिकारी, मधु उपाध्याय र निराजन कँडेल लगायतका १५ सदस्यहरू रहेका छन् ।
कार्यक्रममा बोल्दै ग्याँस विक्रेता महासंघका केन्द्रीय अध्यक्ष ज्ञानेश्वर अर्यालले ग्याँस व्यवसायमा हाल देखिएका नीतिगत र व्यवहारिक समस्याहरू औंल्याए । उनले व्यवसायीका समस्यालाई सरकारले गम्भीर रूपमा लिनुपर्ने र दुवै पक्ष मिलेर अघि नबढेसम्म सहज आपूर्ति र समस्या समाधान सम्भव नभएको कुरामा जोड दिए ।
त्यस्तै, बुटवल उद्योग वाणिज्य संघका महासचिव मुक्ति अधिकारीले ग्याँस व्यवसायको संवेदनशीलताबारे ध्यानाकर्षण गराए । उनले ग्याँस प्रज्ज्वलनशील पदार्थ भएकाले व्यवसाय सञ्चालन गर्दा सुरक्षा मापदण्डमा कुनै सम्झौता नगर्न र सधैं चनाखो रहन व्यवसायीहरूलाई आग्रह गरे ।
कार्यक्रममा निवर्तमान अध्यक्ष प्रदिप प्रसाद पन्थले आफ्नो कार्यकालमा भएका उपलब्धी र चुनौतीहरूको चर्चा गरे । रूपन्देही भारतीय सीमासँग जोडिएको जिल्ला भएकाले यहाँ अवैध रूपमा हुने ग्याँस तस्करी प्रमुख समस्या रहेको र त्यसका विरुद्ध संघले सक्रिय भूमिका खेलेको उनको भनाइ थियो ।
अधिवेशनमा उद्योग संघका पूर्व अध्यक्ष सागरमल अग्रवाल, तिलोत्तमा उद्योग वाणिज्य संघका उपाध्यक्ष सुरज पंगेनी, पत्रकार महासंघका उपाध्यक्ष विश्वास ढकाल र बुटवल ग्याँसका सञ्चालक भुपाल क्षेत्री लगायतले बोलेका थिए । कार्यक्रमको सञ्चालन महासचिव सूर्य खनालले गरेका थिए ।
