१७ वर्षे किशोर इशान शर्माको रहस्यमय मृत्यु केवल एक परिवारको व्यक्तिगत शोक मात्र होइन, यो राज्यको अनुसन्धान क्षमता, न्याय प्रणालीको विश्वसनीयता र समाजको सामूहिक संवेदनासँग प्रत्यक्ष जोडिएको गम्भीर विषय हो । पढाइ र खेलकुदमा अब्बल, परिवारका एक्ला छोरा इशानको असामयिक मृत्युले त्यहाँको सिंगो समाजलाई नै स्तब्ध बनाएको छ ।

जिल्ला प्रहरी कार्यालय रुपन्देहीले सार्वजनिक गरेको प्रारम्भिक अनुसन्धानले घटनालाई सवारी दुर्घटना भनेको छ । सवारी साधन, चालक र सहयोगीहरू नियन्त्रणमा लिइएको छ, जुन अनुसन्धानको सकारात्मक पाटो हो । परिवारले प्रहरीको निष्कर्षलाई अस्वीकार गर्दै यसलाई योजनाबद्ध हत्या भएको दाबी गरिरहेको छ यसको आधार के हुनसक्छ ? खोजी होस् ।
घटनास्थलको अवस्था, प्रत्यक्षदर्शी नदेखिनु, रगत वा घसारिएको स्पष्ट चिन्ह नदेखिनु, साँझको व्यस्त समयमा पनि कसैले ठक्करको आवाज नसुन्नुजस्ता प्रश्नहरूले प्रहरीको प्रारम्भिक निष्कर्षमाथि गम्भीर आशंका जन्माउनु स्वभाविक हो । तर, यो घटनामा प्रहरीले कुनै दोषीलाई उम्काउन यो सब गरिरहेको हो जस्तो लाग्दैन । प्रहरीको अनुसन्धानलाई नै इन्कार गर्नुपर्ने अवस्था पनि देखिँदैन । भावनात्मक प्रतिक्रियामा बहकिनु पनि राम्रो हुँदैन । यसका साथै भ्रमको नियन्त्रण गर्दै विश्वास निर्माणको पनि उत्तिकै खाँचो छ ।

प्रहरीले सामाजिक सञ्जाल र केही सञ्चारमाध्यमले भ्रम फैलाएको भन्दै जसरी ध्यानाकर्षण गराएको छ यो एकप्रकारले जिम्मेवार बनाउने उपाय पनि हो । हाम्रा कतिपय मिडिया र सामाजिक सञ्जालहरु अपुष्ट सूचना र सनसनीपूर्ण प्रस्तुति गर्दै समाजमा हानी पु¥याउन पनि उद्दत देखिन्छन् । यसलाई रोक्नुपर्छ । पीडित परिवारको असन्तुष्टिलाई मसला बनाएर कतिपय युटुबेहरुले टीआरपी बढाउने काम पनि गरिरहेको देखिन्छ । यसलाई रोक्नुपर्छ ।

स्वतन्त्र र उच्चस्तरीय अनुसन्धान आवश्यक परे सीसीटीभी विश्लेषण, फरेन्सिक रिपोर्ट, मोबाइल लोकेसन, डिजिटल ट्रेल सबै सार्वजनिक गर्नुपर्छ । साथै परिवारलाई अनुसन्धान प्रक्रियामा विश्वास दिलाउने पारदर्शिताको काम गर्नुपर्छ । तथ्य र प्रमाण देखाएर जवाफ दिने र दोषी जो कोही भए पनि संरक्षण नहुने स्पष्ट सन्देश दिन जरुरी छ । दुर्घटना हो भने पनि लापरवाही र प्रमाण लुकाउने अपराध गम्भीर हुन्छ, हत्या हो भने त झन् कठोर कारबाही अपरिहार्य छ । इशान अब फर्केर आउँदैन । तर, उसलाई न्याय मिल्यो कि मिलेन भन्ने प्रश्नले समाजलाई पछिसम्म पछ्याइरहनेछ । आज इशानको परिवार न्याय खोज्दैछ, भोलि त्यो अवस्था कसैको पनि हुनसक्छ । त्यसैले यो मुद्दा भावनाको होइन, न्याय, सत्य र राज्यको जवाफदेहिताको परीक्षा हो ।